Radium Girls True Story | History Ka Sabse Khaufnaak Industrial Crime

Introduction 

Radium Girls: Jab Ladkiyon Se Unki Haddiyan Cheen Li Gayi

Kabhi-kabhi kuch cheeze itni khubsurat lagti hai ki hum unke peeche chhupe maut ke saaye ko dekh hi nahi paate. 1917 ka wo daur tha, jab duniya World War I ki aag mei jal rahi thi, lekin America ki factories mei kaam karne wali kuch ladkiyan khushi se jhoom rahi thi. Unhe ek aisa kaam mila tha jo us waqt "glamorous" maana jata tha. Wo thi Radium Girls.

Lekin unhe kya pata tha ki jis "chamak" (glow) ke liye wo itna khush hai, wahi chamak unki haddiyon ko andar se gala degi. Ye kahani sirf ek industrial accident ki nahi hai, ye kahani hai vishwasghat (betrayal), dard, aur ek aisi himmat ki jisne history ko hila kar rakh diya. Hello dosto InfoNovaX  me apko swagat hai to chalo chalte hai history ke us dard ko mahsoos karne jo radium Girls ne bardaasht kiya tha. Hame instagram par follow kare 👉 Instagram

Khwabo Ki Naukri Ya Maut Ka Bulawa?

1900s ki shuruwat me 'Radium' naya-naya discover hua tha. Logo ko lagta tha ki ye koi jaaduyi tatv hai jo bimariyaa theek karta hai aur taqat deta hai. Isliye jab United State radium corporation ne ladkiyon ko ghadiyo  (watches) ke dials par radium paint karne ke liye hire kiya, toh ladkiyaa khud ko kismat-wala samajhne lagi.

Ye kaam patriotic bhi tha kyunki ye ghadiya soldiers ke liye banayi ja rahi thi taaki andhere trenches mei wo time dekh sake. Salary achi thi, aur kaam saaf-suthra lagta tha. Ladkiya factories se ghar jaati thi toh unke kapde aur baal radium ki wajah se andhere mei chamakte the. Wo " Ghost Gorls" ke naam se mashhoor ho gayi thi. Wo apni dress par, apne naakhuno par aur yaha tak ki apne daanto par bhi shauk-shauk mei ye paint laga leti thi taaki wo parties mei "glow" kar sakei.

Ye bhi padhe 👇 

3-aadmi-3-experiments-jab-science-ke naam par Jinda insaano ko maar diya

.

Redium girl 

"Lip, Dip, Paint" - Wo Zehreeli Technique

Sabse khaufnaak baat ye thi ki company ne in ladkiyo ko ek khaas technique sikhayi thi—"Lip, Dip, Paint." Ghadiyon par number likhne ke liye brush ki nok (tip) ka patla hona zaruri tha. Supervisors ladkiyo ko bolte the:

Brush ko apne hontho (lips) ke beech rakho taaki wo pointy ho jaye.

Paint mein dubao (dip).

Dial par paint karo.

Jab kuch ladkiyo ne pucha ki kya radium khana safe hai, toh managers ne jhooth bol diya ki "Radium toh sehat ke liye acha hai, isse gaal gulaabi honge." Jabki sachai ye thi ki factory ke malik aur scientists khud radium se bachne ke liye lead (seesey) ke aprons pehente the aur chimbte (tongs) use karte the. Unhe pata tha ye zeher hai, lekin munafa (profit) ke liye unhone ladkiyo ko maut ke muh me dhakel diya.

Jab Shareer Tootne Laga: 

The Horror Begins

Kuch saalon tak sab theek laga, lekin phir 1920s ke aate-aate ladkiyo ke saath ajeeb cheeze hone lagi. Sabse pehle unhe daanto me dard shuru hua. Dentist ke paas jaane par pata chalta ki unka daant nikaalna padega. Lekin jaise hi daant nikaala jata, wahan ka ghaav bharta hi nahi tha.

Dheere-dheere unke jabde (jawbones) itne kamzor ho gaye ki wo tootne lage. Ek ladki ka jabda toh doctor ke haath mein hi aa gaya jab wo uska ilaaj kar raha tha. Unki haddiya "honeycomb" (madhumakhi ke chhate) jaisi khokhli ho gayi thi. Radium calcium ki jagah unki haddiyo me ghus gaya tha aur andar hi andar radiation explode kar raha tha.

Ye dard itna bhayanak tha ki shabdo me bayan nahi kiya ja sakta. Unke shareer par bade-bade tumors nikal aaye. Wo ladkiya jo kabhi chamakti thi, ab zinda laash ban chuki thi.

Redium damage 

Insaaf Ki Jung: Grace Fryer Ki Himmat

Jab ladkiya company ke paas gayi, toh company ne saaf inkaar kar diya. Unhone doctors ko paise khilaye taaki wo reports me jhooth likhe ki ladkiyo ko "Syphilis" jaisi bimariyan hai, taaki unka charitra kharab kiya ja sake.

 lekin Grace fryer ,jo khud ek victim thi, wo chup nahi baithi. Uske daant gir chuke the, wo chal nahi paati thi, lekin usne tay kiya ki wo ladegi. Do saal tak use koi wakeel nahi mila kyunki badi company se ladne ki himmat kisi me nahi thi. Aakhirkar, ek jawan wakeel Raymond berry ne unka case liya.

Ye jung aasaan nahi thi. Court me ye ladkiya itni bimar thi ki wo witness stand tak chal kar bhi nahi ja sakti thi. Unhe pata tha ki wo shayad case jeetne tak zinda bhi na bache, lekin wo aane wali peedhi (generation) ke liye lad rahi thi.

Ye bhi padhe 👇 

im-not-dead-mar-kar-phir-kyun-zinda-hue. Click here

historic Radium Girls suit”

Ek Jeet Jo Bahut Der Se Mili

1928 me, media ke pressure aur ladkiyo ki halat dekh kar duniya hil gayi. Ant me, company ko jhukna pada.Redium Girls ko settlement mila—har ladki ko $10,000 (aaj ke hisaab se badi rakam) aur medical kharcha.

Lekin paiso se zyada badi cheez thi unka impact. In ladkiyo ki wajah se America me "Labor Safety Laws" bane. Aaj agar factories me workers ko safety gear milta hai, toh uska shreya (credit) inhi ladkiyo ko jata hai. Unhone apni jaan dekar ye sabit kiya ki kisi bhi company ka munafa insaan ki jaan se badhkar nahi ho sakta.

Unki maut ke baad bhi, kai ladkiyo ki kabre (graves) aaj bhi Geiger counter par radiation dikhati hai. Wo aaj bhi apni kabro se 'chamak' rahi hai, duniya ko ye yaad dilane ke liye ki unhone kya khoya.

Ye bhi padhe 👇 

The-time-travel-kyu-ham-time-me-aage. Click here

.

Radium Girls true story”

Thanks for visiting InfoNovaX 

Radium Girls ki kahani hume sikhati hai ki corporate greed kitna andha ho sakta hai. Unhone hame wo haq dilaye jo aaj hum granted lete hai. Jab bhi aap kisi purani glow-in-the-dark ghadi ko dekhe, toh yaad rakhiyega—us chamak ke peeche kisi ladki ki aakhri saans chupi hai.

Ye "Ghost Girls" mar kar bhi amar ho gayi, taaki hum surakshit reh sakein. Dosto ye dard pida bus un ladkiyo ne saha to milte hai apko kisi aur new article me,agar apko es article ke bare me koi sawal jawab ho to hame comment karke batae or instagram par dm karo.. article by InfoNovaX